బంగాళాఖాతంలో ఏర్పడిన అక్వాన్ తుపాను (Cyclone Akvan) కేవలం గంటకు 3 కిలోమీటర్ల వేగంతో కదులుతోందని భారత వాతావరణ శాఖ (ఐఎండీ) తాజా బులెటిన్లో పేర్కొంది. సాధారణంగా తుపాను తీవ్రతను దాని గాలుల వేగంతో అంచనా వేస్తారు. అయితే తుపాను ఎంత వేగంగా కదులుతోంది అనేది కూడా కీలకమే. ముఖ్యంగా నెమ్మదిగా కదిలే తుపానులు ఒకే ప్రాంతంపై ఎక్కువసేపు ప్రభావం చూపి భారీ వర్షాలు, వరదలకు కారణమయ్యే అవకాశం ఉంటుంది. తుపాను వేగం తక్కువగా ఉన్నప్పుడు దాని వర్షాన్ని మోసుకొచ్చే మేఘాలు, గాలులు ఒకే ప్రాంతంపై ఎక్కువ సమయం కొనసాగుతాయి. దీంతో సుదీర్ఘంగా వర్షాలు కురిసి నీరు పెద్దఎత్తున పేరుకుపోవచ్చు. ఫలితంగా నదులు, వాగులు పొంగిపొర్లడం, లోతట్టు ప్రాంతాలు నీటమునగడం వంటి ప్రమాదాలు పెరుగుతాయి.
2021లో Journal of Hydrometeorologyలో ప్రచురితమైన అధ్యయనం ఈ అంశాన్ని పరిశీలించింది. 2010 నుంచి 2019 మధ్య తీరాన్ని దాటిన 280 ఉష్ణమండల తుపానులను పరిశోధకులు విశ్లేషించారు. తుపాను ముందుకు కదిలే వేగానికి, దాని ప్రభావంతో ఏర్పడే వరదల తీవ్రతకు మధ్య సంబంధం ఉన్నట్లు గుర్తించారు. నెమ్మదిగా కదిలిన తుపానులు సాధారణంగా ప్రభావిత ప్రాంతాల్లో ఎక్కువ మొత్తంలో వర్షపాతాన్ని నమోదు చేశాయని అధ్యయనం పేర్కొంది. తుపాను గాలుల తీవ్రత ఒక్కటే వరద ముప్పును నిర్ణయించదని కూడా పరిశోధకులు స్పష్టం చేశారు. తుపాను పరిమాణం, తీవ్రత, వర్షపాతం విస్తరణ, నేలలో ఇప్పటికే ఉన్న తేమ, భూభాగం వాలు వంటి అంశాలు కూడా వరదల తీవ్రతను ప్రభావితం చేస్తాయి. కొన్ని సందర్భాల్లో తక్కువ తీవ్రత కలిగిన తుపానులు సైతం భారీ వరదలకు కారణం కావచ్చని ఈ పరిశోధన వెల్లడించింది.